Hans Stahel

Als Chind wott er äs Ross im Chäller ha,
scho damals fangts mit tolle Ideä aa!
Mit sächzähni isch er go d’Schwiiz umrunde,
hät dussä gschlafe und’s Velo am Handglänk aabunde!

Für Technik hät er sich scho früeh intressiert,
da wird alles zerleit und gnau schtudiert!
Er schruubt am Bäbi de Chopf eifach ab –
da hät d’Schwöschter gstuunt und das nöd zu knapp!

Egal was chunnt, er packt das aa,
will euse Hans das meischtere cha!
Drum hebed d’Gläser, stimmed ii:
Hüt sell er euse König sii!

Sini Fründin hät er zersch mal fintiert,
und ä Reis is Tessin organisiert!
Sie stiigt in Zug und märkt erscht spaat,
dass es stattdesse uf Bärn an Cup-Final gaht!

Z’Schwedä im Kanu über de Wasserfall ab,
voll ine is Wasser, doch dä Hans macht nöd schlapp!
De Hecht am Spiäss, d Schlafsäck am Füür,
de Hans liebt söttig Abentüür!

Egal was chunnt, er packt das aa,
will euse Hans das meischtere cha!
Drum hebed d’Gläser, stimmed ii:
Hüt sell er euse König sii!

Nach äm Après-Ski isch er in Bachgrabe gfahre,
hät ä Stund lang gkämpft us dene Gfahre!
In Margon baut er Brunne und Torböge us Stei,
ja Südfrankriich isch jahrelang sis zweite Dihei!

Er tüftlet i de Wärkstatt Tag und Nacht,
hät all sini Ideä zum Läbe bracht!
Baut Hüüser, Fahrzüüg und grossi Ross –
und bestimmt au so mängs Luftschloss!

Egal was chunnt, er packt das aa,
will euse Hans das meischtere cha!
Drum hebed d’Gläser, stimmed ii:
Hüt sell er euse König sii!